شعر حب عراقي

موعد حب

هو: اشلونچ يا أعز الناس عندي .. هو الگلب چم أحبيبه عنده ..

هي: هزني الشوگ عالموعد اتانيك ..

وأعد بيدي الدقايق وحده وحده ..

وحده .. اثنين .. هاي الثالثة تروح ..

أتاني وصار هالموعد اشبعده نمت حسبالي أشوفك بالحلم جاي ..

وگلت دمعاتي احطهن وسط خده

هو: نمتي .. هنيالچ غفيتي ..

وآنة ليلي يمر على عيوني صبح الينيَّم وردة ويمسد عليها..

مو مثل ليلولي وينيم جرح .. !!

والغفه ابكلمة محنه ..

مو مثل الينام وبعينه ملح ..!!

هي: لا حبيبي ..

آنه هذا الليل من يمرني دمعة..

وحزن.. واشواگ .. وحنين آنه عيني عليك ما بطل دمعها ..

تبچي ما تسكت العين ..

هو: لا .. لا تبچين ..

امسحي دمعتچ وارجوچ لا تبچين ..

يل دمعچ جمر وخدودچ احلى أورود ..

خايف على اخدودچ من دموع العين ..

لا تبچين ..

وردة وتحترك ما تحمل النيران ..

يذبل كل ورگها وتستحي من الطين ..

هي: وانت تگلي لا تبچين ..

مو عمري انتهى .. وأيامي كلها أتروح ..

لو راح العمر متگلي أجيبه امنين..؟

هو: لا تبچين ..

المن بعد المن تسوه دمعه أتطيح ..

هو اشباقي بينا ونحترگ كل حين ..

تعبنا القهر ممشى جزيرة وخوف ..

صار الماضي غلطه وچنه غلطانين !!

لا تبچين لو يسوه العمر يمكن بچينا اسنين ..

هي:اشلون اتگلي لاتبچين ..

هو: لا تبچين ..!!

هي: تدري أنت اليحب ما يگدر اعله النار ..

ويا نار اللي بيَّه أتفزز الميتين ..

احتاج الدمع من ما أشوفك يوم ..

لأن يصبح عليَّ اليوم خمس سنين ..!!

حبيبي لخاطري ..

لا تبتعد أرجوك ما احمل فراگك ..

تدري كلش زين ..

هو: بس ارجوچ لاتبچين ..

خوفي إنه عليچ من الدمع والله ..

مرات الدمع ياخذ حلاة العين ..

ويل كلچ ترافه ارجوچ لا تبچين

بَرِد تموز حبك من يمر صيف

وحر تشرين يانار اشتياقي

راقي ما شفت بس انته والله

والغيرك چِذب من گال راقي

وكافر بالعشگ ماعندي الإيمان

بس بعدك نعم صار اعتناقي

وإحساسي نبي من راد يهواك

كسّر كل هُبل قبل التلاقي!

يا شعري وقضيتي والمكاتيب

يا سهر الليالي واحتراقي

ألك كل العمر ومقصِّر وياك

يا بيتي ومحلتي وكل زقاقي

وعليك العين تعمه لو غبت يوم

ويحالي شلون لو طال الفراقي

لا تبعد عَلي ياسلوة الروح

وعهدي أوياك اسمعه واتفاقي

على هذه الگلب كثرة اليمرّون

وعيونك فقط بس انته باقي

وصحيح انته حلو وهواي عشاگ

لكن يختلف عشك العراقي

صدّك يختلف عشك العراقي

خربت ! زمن مجنون

خربت من شفت جنحان عند الفيل .. ومن شفت النوارس صارت ذيابه

وخربت من شفت مرَّه الأسد مرعوب .. خايف ما طلع بالليل للغابة !

مجنون الزمن لو عقلي المجنون .. هذا الشفته من هو اليعرف أسبابه؟

وجبت أيدي غصب گتلهه فركي العين .. بلكي مو صدگ وينچ يا سبّابه !

تالي اتيقنت موبس حلم لا طيف .. واقع حال بس ظنوني مرتابه

شفت الناس .. بعض الناس .. غير الناس .. شفت الناس نفس الشفته بالغابة

واحد من يهد ويهد گبل بالسيف .. عاف السيف هسه وينخه بگراب

واحد مقتنع يوسف كلاه الذيب.. وتگله چذب وايگول لا يابه

واحد ما دره .. ما يعرف الي صار .. شاهد راح لمن صارت اطلابه

واحد ينسأل تعرفهه بت فلان .. جاوبهم چذب وايگول حبابه

واحد چان واحد هسه صار اثنين .. لأن وجهين عنده وغاش أصحابه

أو .. واحد ..

أو .. واحد ..

أو .. واحد ..

والاضرب بعد سألوا طفل بالعيد.. شتحب تشتري.. شنجيب لـعّابه؟

دبابه صرخ يلعب حرب وايريد ميعيّد إذا ما عنده دبابه !

وطفل ثاني شرد يرضع شوارع گام.. ويكره للأسف مدرسته وكتابه

وطفل ثالث .. وطفل رابع .. وطفل خامس ..

وأخيرا

مجنون الزمن فعلاً طلع دولاب .. وبكيفه يفر لو راد دولابه ..

وبكيفه يفر لو راد دولابه

أحبّك

أنا بس بالكلام وذايب بحبّك

وأفكر بيك أنا في ليلي ونهاري

إذا شفتك صدّك شو يصير أنا بحالي

أظن يغمى عليّ وافقد إبصاري

تعال وصير إلي بالحب غطا وفراش

ودفّيني بحنانك واعرف أسراري

أحبّك كالطفل من يهوى صدر أمّه

يموت من القهر لو فطمته إجباري

زرعتك بالعشق وردة وصرتلك ماي

غصن حبّك شرب من أعذب أنهاري

أنا بدونك مثل بيت أنهدم ساسه

تعال ابني أساسي وابدأ أعماري

حبيبي ارحم بحالي حن على قلبي

أنا بهجرك دمع بعيوني ضل جاري

صرت أنت بقلبي كالنّبض والدم

وسمّيتك حبيبي ملهم أفكاري

حبك خله العالم وردي

حَبَّكَ خُلُّهُ الْعَالِمُ وَرَدي

غَيْرَ عُيُونِكَ أنا شعندِي

حُبَّكَ غَيَّرَنِي وَخَلَانِي

حُبيَّتكَ وَحَدكَ بَس أَنْتَ

بِنَظَرَاتِكَ تُحْرِجُنِي وأنسه

وَيْنَ تَوَدِّينَي اليا مَرْسى

ضايع عُمَرَي القبلك عشتَه

كُلَّ عُمَرِي ضايع أنا عشته