قصيدة: الدنيا صندوق دنيا
قال الشاعر صلاح جاهين في قصيدة صندوق الدنيا:
الدنيا صندوق دنيا
دور بعد دور
الدكة هي
وهي كل الديكور
يمشي اللي شاف ويسيب لغيره مكان
كان عربجي أو كان إمبراطور
عجبي!
قصيدة: غمض عينيك وارقص بخفة
قال الشاعر صلاح جاهين في قصيدة غمض عينيك وارقص بخفة:
غمض عينيك وارقص بخفة ودلع
الدنيا هي الشابة وأنت الجدع
تشوف رشاقة خطوتك تعبدك
لكن أنت لو بصيت لرجليك تـقع
عجبي!
قصيدة: مرغم عليك يا صبح
قال الشاعر صلاح جاهين في قصيدة مرغم عليك يا صبح:
مرغم عليك يا صبح
مغصوب يا ليل
لا دخلتها برجليا ولا كان لي ميل
شايليني شيل دخلت أنا في الحياة
وبكرة هاخرج منها شايليني شيل.
قصيدة: يأسك وصبرك بين إيديك
قال الشاعر صلاح جاهين في قصيدة يأسك وصبرك بين إيديك:
يأسك وصبرك بين إيديك وأنت حر تيأس ما تيأس
الحياة راح تمر
أنا دقت من دة ومن دة وعجبي لقيت
الصبر مر وبرضه اليأس مر
عجبي!
قصيدة: أيا إنسان ما أجهلك
قال الشاعر صلاح جاهين في قصيدة أيا إنسان ما أجهلك:
إنسان .. أيا انسان ما أجهلك
ما أتفهك في الكون وما أضألك
شمس وقمر وسدوم وملايين نجوم
وفاكرها يا موهوم مخلوقة لك
عجبي!
قصيدة: ميلاد
قال الشاعر صلاح جاهين في قصيدة ميلاد:
بعد ولادتي في الزمن تلاتين سنة
أصبحت تاريخ زي السيوف والسقايين
زي الشراكسة والشموع والسلطنة
زي الخيول ضاعت سنيني في السنين
القاهرة والألف مدنة شمعدان
آدم عريس في بولاق وحوا في الحريم
القاهرة والناس في كهف الليل ديدان
آدم وحوا بيقروا توفيق الحكيم
غناها بشرف كرد غنته له العجم
رديت أنا من فوق بجواب الجواب
وخرجت كالعنقود من كرم العدم
قطرة حياة محلوبة من ضرع السحاب
آدم وحوا شقَّطوني في الهوا
زي المخدة الريش ولعبوا في السرير
صرخت ضموا الصرخة بالحضنين سوا
ونعست نمت سعيد في المهد الحرير
جدي رفع يدي بطرطوفة البنان
ضحكت شواربه وكرمشت أركان عينيه
مولود ذكر ينشال عكفوف الحنان
محروس من الله والملايكة حواليه
يا هلترى الطفل اللي نايم يبتسم
من خلف جدران في العدد تلاتين سنة
هو الحزين هو البدين الملتحم
هو أنا يا رب
والا مش أنا.
قصيدة: بكرة أجمل من النهاردة
قال الشاعر صلاح جاهين في قصيدة بكرة أجمل من النهاردة:
والزمن فات، فات سنين
تحبل النسوان وتولد
ملايين
والغيطان
ترمي غله وفول تلول في كل رمية
ترمي توم وخيار وباميه
والشجر يطرح جوافة وبرتقان
والعنب تحت الورق الأخضر يعنقد
لما تبقى الشمس حاميه.
قصيدة: مرحب
قال الشاعر صلاح جاهين في قصيدة مرحب:
مرحب ربيع مرحب ربيع مرحبا
يا طفل يا للي في دمي ناغا وحبا
علشان عيونك يا صغنن هويت
حتى ديدان الأرض والأغربة
عجبي!
قصيدة: أنغام سبتمبرية
قال الشاعر صلاح جاهين في قصيدة أنغام سبتمبرية:
وقف الشريط في وضع ثابت
دلوقت نقدر نفحص المنظر
مفيش ولا تفصيلة غابت
وكل شيء بيقول وبيعبر
من غير كلام ولا صوت
أول ما ضغط الموت
بخفة وبجبروت في يوم أغبر
علي زر في الملكوت
وقف الشريط في وضع ثابت
دلوقت نقدر نفحص الصورة
انظر تلاقي الراية منشورة
مِتْمَزّعة لكن ما زالت فوق
بتصارع الريح اللي مسعورة
وانظر تلاقي جمال
رافعها باستبسال
ونزيف عرق سيال علي القورة
وفي عنفوان النضال
وقف الشريط في وضع ثابت
انظر اليه شوف قبضته السمرة
وعيونه ثورة مكحلة بثورة
وصدره عرض الأرض حاضن مصر
