شعر بدر بن عبد المحسن

قصائد بدر بن عبد المحسن

سنعرض لكم في هذا المقال مجموعة مختارة من قصائد الأمير بدر بن عبد المحسن بن عبد العزيز آل سعود، ومنها:

صداقة بالنظر

علمتني .. أعقد صداقة بالنظر

مع ساعتي .. قبل اللقا ...

وكيف الثواني ما تمر ..

والشمس .. ما تنوي المغيب ..

علمتني .. إن الحبيب .. دايم حبيب

مهما هجر ..

سيل الظلام ..

يملى الشوارع ليل ..

ولا جيت أنام ..

أرخي الستاير .. عن شعاع ..

عن صوت .. وأقفل بابنا ..

يدخل قمر أحبابنا .. مدري أنا من وين

ساكن قمر أحبابنا .. بين الهدب والعين ..

أرجع أناظر ساعتي .. واللي مضالي من السهر ..

علمتني .. إن الحبيب .. دايم حبيب ..

مهما هجر ..

ياللي عيوني مرايتك ..

وفي كتاب دمعي حكايتك..

ما أظن تنساني أنا ..

وجهي تركته في ساعتك

لا .. تخون وداعتك

تذكرني في ليل .. وفـ سهر .. وفـ حلم

تذكرني في بيت من شعر .. أو اسم ..

علمتني .. إن الحبيب .. دايم حبيب ..

مهما هجر ..

شمس الورق

أنا بظهر من سكوتي قبل شمس الورق ما تغيب

قبل حبر الليالي يجف .. وأنا ما غنت جروحي

قصيدة .. خذتها من طفل .. ما أظنه أبد بيشيب

ولكنه نزح عني .. مثل إحساسي بروحي

أبا اكتب للسماء نجمه.. ابا اكتب للخزامى طيب

واباكتب لين أحس القلب لا يكتب ولا يوحي

يموت في قلبي الشاعر ويغتال المشاعر ذيب

ولا أدري افزع للضحكي .. أو أحمي صرختي ونوحي

حزينة هالقوافي لا .. ولكن من يعرف الغيب

سعيدة هالقوافي .. بـ انتظر لين آخرة بوحي

تعالي نتيع الضي البعيد في عتمة التغريب

ولو مليتي من أجمل قصايد غربتي روحي

أنا النخيل

بين القلم وأصابعي والورق شوق

عشرين حولٍ .. من كتبت القصايد

من يوم بان القلب .. وأخفيت بالموق

دمع .. وغدالي بالمحبة .. وعايد

كتبت ما كني على الشعر مسبوق

وقريت ماكن افـ قصيدي .. جدايد

ونزفت لين اتعبت لا حصل اعروق

وسهرت لين أمست نجومي قلايد

وصرت الليالي بين عاشق ومعشوق

وصرت الوصل ما بين حاضر وبايد

أنا النخيل وشعري اظلال وعذوق

وانا السحاب اللي على الناس جايد

وفـ ليلةِ حسيت من جرحي اعقوق

وقف النزيف وما بذي له عوايد

صار الورق ما بين مهمل ومشقوق

وحار القلم ما بين ناقص وزايد

من الشعر مليت ياحادي النوق

ومن الجروح اللي .. تمل الضمايد

ومن الحروف ونقصها مع هل السوق

وكذب الحسود .. وهم راعي المكايد

ومجاد لي في كل ساذج ومطروق

وخوفي على غر المعاني الفرايد

عشر السنين وعشر .. والجوف محروق

ما غير أشب أطراف ليلي وقايد

مانيب أدور من ورى نزفي احقوق

ولا أبي من سهر عيني فوايد

لو ما بقالي في الملا غير مخلوق

لا من ذكر شعري .. جفته الوسايد

كني بجبين الشمس .. والليل مفروق

وكني بدمعٍ .. فوق خده نضايد

افداه عمري .. ماشكى صاحبه عوق

لا شك ما في النفس لو قيل كايد

أغصان المساويك

تجلس عجوز .. في أول السوق ..

وبين الشبابيك .. وتبيع السوالف ..

وأغصان المساويك ..

وما يخالف .. لو باعتني الحكي ..

الحكي غالي هالأيام ..

مريتها .. أبي الكلام ..

قلت: يا خالة أنا ..

إن نسوني الناس .. زعلت ..

والى اذكروني الناس .. زعلت ..

صمتي وحروفي مبعثرة ..

ضحكت وقالت:

لو عدلت .. سلمت قلب وحنجرة ..

ما عطيتها فلوس على هذا التعب ..

وما ريحتني من التعب ..

قمت وعلى عيوني غباش ..

مدت لي مسواك جديد ..

عييت ..

وقالت لي بلاش ..

إن كانت سنونك نظاف ..

حطه في جيبك يا ولدي ..

يجلي محانيك الرهاف ..

من كل إحساس ردي ..

عض النواجذ

أقوم بجبالٍ ولا أقيم في سفح

لو أطعموا لحمي لعوج المخالب

يا بنت ما به ذنب يصعب على الصفح

كود الهوان وعيش سحم الثعالب

لا والذي كرّم جديلك عن النفح

العز ما هو بين شاري وجالب

الله خلقنا .. تلفح وجيهينا لفح

حر السمايم في عزيز المطالب

سوى رضينا أو طفح كيلنا طفح

عض النواجذ طبع والطبع غالب

إنشد البحار

أنشد البحار على سر الحنين

عن قصيد البحر .. وجروح السفين

عن حبال الشوق تظمأ للشطوط

عن حروق الملح في شفاه السنين

ما عرفت الغوص في اليم المخيف

ولا رهنت العمر في الدر الثمين

جيت أنا من نجد .. في قلبي الرياض

وفي عروقي التهم .. والبيت الأمين

في كفوفي تصرم نخيل الحسا

ومن ذواري الرمل غادي لي جبين

جيتكم .. والعشق يطرحني سؤال

هو صحيح الشط له صدر ويدين

عانقتني بيوتكم .. وأنا بعيد

ما عبرت الجسر .. ما شفت القطين

ياهوى البحرين مريت الديار

عابرٍ والقلب باللهفة ضنين

لين حطت بي رحالي في هواك

وانبعث نبع المحبة في الكنين

فاتر اللحظ

فاتر اللحظ .. ياعذب اللمى ..

يا قريب الدار.. يا بعد السما ..

لوجرحت الروح .. لودمعي همى

يا ظما المجروح .. ما بعدك ظما

في هجير الشوق .. ظللني بهدب

من عذاب الجرح .. داويني بعتب

اسقيني منك .. رضى والا غضب ..

لوجرحت الروح .. لودمعي همى

يا ضما المجروح .. ما بعدك ظما

يا غريب الدرب .. وأشواقك سفر

العنا في القلب .. والشكوى نظر

يا قمر بانشدك .. عن نور القمر

لو جرحت الروح .. لو دمعي همى

يا ظما المجروح .. ما بعدك ظما

يا سواد العين .. والدمعة شجن

لا يصير العمر .. للفرقى ثمن

الدقايق .. شمع .. ذوبها الزمن

لو جرحت الروح .. لو دمعي همى

يا ظما المجروح .. ما بعدك ظما