قصيدة: عرفة وجيه
يا كثرهم.. لا قلت لك.. عرفة وجيه
- وياقلـهـم.. لا قـلـت.. قــدر ومـعـزه
رجـلٍ.. تعـزه بعـد ما تلتـقـي.. فـيـه
- ورجـلٍ.. قبـل ماتلتقـي بـه.. تـعـزه
ورجـلٍ.. تـرزه بالمجـالـس مبـاديـه
- ورجـلٍ.. فلوسـه بالمجـالـس تــرزه
ورجلٍ.. يموت ولا يجيبـون طاريـه
- ورجل.. يجي طاريـه فـي كـل حـزه
ورجلٍ يهزه.. بعض موقف ويشقيه
- ورجلٍ.. مهوب أيّات موقف يهـزه
ورجلٍ.. ضعيف.. ويستفزه معاديه
- ورجـلٍ.. كـلام أعـداه.. ما يستـفـزه
ورجلٍ.. تلزه يعترف لـك.. بخافيـه
- ورجـلٍ.. علـى خافيـه.. محـدٍ يلـزه
ورجلٍ.. يوزونه.. ويزعـل بنيخيـه
- ورجلٍ.. يزعّـل مـن يحـاول، يـوزه
ورجلٍ.. تكـزه لا زم إنـك.. توصيـه
- ورجـلٍ.. بلـيّـا مــا توصـيـه.. كــزه
من لا فرش.. للمرجلـه.. ما تغطيـه
- ومن لا يخز.. النـاس.. محـدٍ يخـزه
إن كنت تعرفني فهي.. عرفة وجيه
- مو شرط لك بالقلب قدر.. ومعـزه
قصيدة: معقول
بنجـوور.. يـا للـي ساكـتـه.. قـولـي لــي
- وشلـون.. قلبـك.. والغـلا.. شاخبـاره؟؟
وشفيـك.. يالله.. صحصـحـي واحـكـي لــي
- وش تقصـديـن.. بـصـورة ٍ محـتـاره!!
معـقـول يعـنـي .... نـاسـيـه .. إيمـيـلـي !!
- كـل ذا زعـل .. !!.. والا دلـع و جــواره ..!!
أيــوه.. كــذا.. تكلـمـي.. يا ويـلـي!!
- لــي ساعـتـيـن.. أكـلـمـك.. يـــا.. حـ
يالله.. تعـالـي واقـعـد .. غـنـي لـــي!!
- مبطـي.. تـرى عـن دبـكـة.. الـهـواره..!!
ميـلـي علـيـه.. يابَعَـدهـم... مـــيلـــي
- دنـيـا الـبـشـر.. يا دنـيـتـي.. دواره !!
ودي .. أبــدد .. مــع صـبـاحـك . . ليلي
- وأقـطـع بحـبـك.. يـا غـلاي.. الـشــاره
شعـر الهجـا.. ما عـاد.. أبـد يعـنـي لــي
- إياكِ أعني.. واسمعي.. ياجاره
قصيدة: تنشد عن الحال
ما دمت تنشد يا رفيقي.. عن الحال
- مالي على.. كتمانها عنك.. حيلة
الصبر عن بوح الأحاسيس.. قتال
- والبوح في بعض المواقف، فشيله
لو كل ما يطري على البال ينقال
- ما كنت أحس إن الثقيلة.... ثقيلة
أبطيت أكافح ضيقة البال بالبال
- وأدفع بلا.. هاجوسها كل.. ليلة
لين أقبلت مثل.. السحابة بهمال
- تشفي غليل اللي.. تزايد غليـله
رعــــــادها خـــــيلًا تـــدابك وتختال
- وبراقها لامــع السيــوف الصقيلـــة
طاحت، ولاْوفق من حناياك منزال
- وسع فضى صدرك لضيق المخيلة
يا بدر.. ماني عال.. لو صحتي عال
- شفني من الصدمات نفسي عليلة
أشيل حملٍ.. لو يشيلنه.. جبال
- الله، وأمانه.. غير تصبح نثيله
أرمي.. من هموم الزمن.. واسحب أدبال
- وأنزل عن (الجوكر) وغيري يشيله
من كثر ما شفت بحياتي من أنذال!!
- بديت أشك إن النذالة... فضيلة
ما طاح من عيني رجل..طاحوا.. رجال
- ورجال (يا بن حنيف) ما هي قليلة
اقرب من اللي قالهم ضمن ماقال..
- راكان ابن حثلين.. راعي الجزيلة
هذا.. ولد عمٍ، وهذا.. ولد خال
- وهذا.. صديق... ما ندور بديله
سبحان منهو يابد بدل الحال!!
- وحط الجفا بين الخليل.. وخليله
هذا الزمن يبغاله.. لسان دلاّل
- من يستحي هالوقت.. واعزتي له
وقتٍ به الراعي غدا.. راعي دلال
- كلٍ على طاريه.. ينفض شليله!!
ومن كان ساسه للردى مضرب أمثال
- اليوم.. يحسب من كبار القبيلة!!
والمال.. المال.. يا صاحب المال
- ذل العزيز.. وعز.. ناسٍ ذليلة!!
